三寶茶餐廳 (已結業)

順路經過三聖村, 見到食評唔錯, 決定入去一試。裝修如一般茶記, 做街坊生意, 環境衛生唔好太高要求。餐廳張圖其實係後門, 前門比後門感覺好好多。早餐午餐下午茶同埋其他碟頭飯都係20幾蚊, 好抵食, 係通脹前水平。午餐時段到2點, 2點後下午茶。同朋友叫左下午茶, 雞翼餐轉雞脾都係加3蚊,我點左雞脾薯條配紅豆冰, 朋友點左雞脾奶醬多配紅豆冰。食左一口奶醬多, 已經哇一聲覺得好好食。多士烘得岩岩好, 配埋奶醬真係一流。紅豆冰好好飲, 真係舊式茶記咁既水準。相比起其他新式食肆, 三寶既紅豆冰真係好出色。椰味&奶味岩岩好, 紅豆軟身起沙, 好正。雞脾都唔錯, 唔會炸得過火,皮脆肉嫩, 肉非常入味。好耐都無食過咁好食既茶餐廳, 感覺很不錯。見到堂食很多人都點左芙蓉蛋飯, 好似很不錯, 下次決定去試試。堂食有人點左凍檸茶, 茶色不錯, 用濃茶沖, 仲有5片厚薄剛好的檸檬。應該都唔差, 下次一於再幫襯。