MX (中華總商會大廈) (已結業)

我不時都會幫襯MX，覺得佢比起n年前既美心快餐進步左唔少，而焗豬扒飯一向都係我既晚餐考慮之列之一。見到地鐵既很大唷焗豬扒飯廣告，覺得呢個豬扒飯都幾有gimmick既，所以搵日午餐就去買外賣試試啦！原來MX同一時間都供應正常版既焗豬扒飯外賣，如果要很大唷的話，就要上樓上點餐了。（如果有黎開呢間既中環仔女都應該知道樓上樓下既餐牌永遠都唔一樣，有時就算買外賣都要上樓上，好奇怪。）一揭開張鐵蓋，即刻睇睇塊豬扒係咪真係好大塊。嘩！原來真係有成吋幾厚，係超級厚！雖然大細同平時食開既無乜分別，但口感真係正好多。豬扒厚左，相對黎講飯真係少左Ｄ，岩哂我呢Ｄ鍾意食肉唔鍾意食飯既人喇。同平時一樣都係有幾片菠蘿同蓄茄，唔鍾意食酸既就有緣無份了。四十幾蚊，用埋報紙減五蚊優惠（係師奶呀，唔得咩？）三十幾蚊有咁既豬扒質素，真係抵食既。