牛石料理 (已結業)

去左親戚屋企玩，咁上下時間就落街食飯，唔想食泰國野，打邊爐果d, 黎左呢間日本野。呢度主打日式燒肉，不過復活節同fd去左燒野食，所以都係叫d日式料理。三文魚壽司，魚生新鮮，夠軟腍。北寄貝壽司，北寄貝好大隻，爽口彈牙，夠鮮甜。加州卷蟹子幾多，食落特別有咬口。整體d壽司都好新鮮，唔會乾晒，飯既份量亦剛剛好。雜錦天婦羅有炸蝦，炸冬菇，炸蕃薯，炸秋葵，炸粉漿唔會太厚，好脆口，而且唔油膩。特別一提係炸秋葵，無左草腥味，亦無黏口既感覺，食落好爽。燒物盛合有8款，燒雞翼，燒雞皮，燒雞頸肉，燒雞軟骨，燒雞腎，燒冬菇，燒青椒仔，燒蕃薯仔，串燒好香，加左鹽黎燒吊下味。燒雞皮好脆口，食落脆卜卜，雞頸肉原來好似豬頸肉咁軟嫩，仲好juicy. 雞腎同雞軟骨好爽口，仲有青椒仔，細細隻原來好香青椒味。豚肉炒飯，飯炒得唔油膩，乾身粒粒分明，有洋蔥既辣香。加埋豚肉同其他配料，食左兩大碗。最後有送既啫喱做甜品，夠凍唔會太甜，好滿足。