強記大牌檔 (已結業)

食友邀請去強記食飯,冇約就當然會去啦! 況且都好想再試大排檔小炒.一行八人,叫o左十四個菜,好似好多,但其實份量太少,再加上有啤酒送,好似食極都唔夠.炒蟶子火路剛好,唔老,有鮮味.鬼馬花枝膠係墨魚膠釀上油炸鬼後再炸,但墨魚膠好薄,份量唔夠大方. 不過油炸鬼再炸就好脆,啱哂我!蜜汁燒風鱔蜜糖味重,而鱔亦燒得好脆,直得推介.蝦子柚皮味道好,柚皮一點苦澀味都冇,好!鹽水蜆係肥美花甲好鮮味,又冇沙,下次一定再叫.椒鹽九肚魚外脆內軟,有水準.焗魚腸唔夠多魚腸,又冇香味,幾次都只有蛋冇腸,幾間有焗魚腸小店中呢間最唔得.墨魚餅又係太薄身,唔夠咬口. 而且亦唔太彈牙,有d失望. 榮興好好多喇!椒鹽蠔算唔錯,不過蠔可以再肥美d就完美喇!荷葉蒸河鮮內有田雞,鱔,同唔記得係咩喇. 不過份量太少,夾幾o下都有人冇得食田雞喇! 下次只係放一款河鮮會好d.紙包骨冇咩特別,係老o左少少,不過味道適中,算可以啦!辣酒煮翡翠螺當然係唔辣啦,不過我都照樣飲d汁,好濃,都有d辣味o既!!炒通菜一般水準啦!!生炒糯米飯就令人失望o左d,各人都覺得似美極炒糯米飯似d,而且都幾咸,同埋太濕.不過整體食物水準唔錯,只不過份量太少.