El Portal (已結業)

唔好以為廟街得大排檔同打冷，原來都有地中海菜食架！今次上咗呢間2樓嘅地中海餐廳，雖然食得唔多嘢，但都覺得認真唔錯！首先要咗個新鮮生蠔混合盤，分別係Ancelin, Gillardeau, Arousa。頭兩款嘅海水味較重，而最後一款嘅蠔肉味就較突出，而除咗檸檬汁之外，仲有個有蔥味嘅醬汁，都幾特別，但我就鍾意檸檬汁多啲。之後再嚟一個炸魷魚，配檸檬汁同蒜香蛋黃醬。魷魚唔會炸得太耐好乾咁，又唔會太厚粉。主菜我哋揀咗個燒烤黑豬排配烤薯仔，其實佢都算係排骨嚟，有條長長嘅肋條，但就大大嚿肉係末端。油香味濃，好多肉汁，大大啖嘅滿足感啱哂食肉獸們呀！另外仲有個醬汁似係燒汁感覺，但我覺得啲肉本身都夠咸。伴菜原本係南瓜嚟，不過主廚話改咗薯仔。我本身鍾意薯仔多過南瓜，再加上佢焗得好好食，唔會太乾，再加啲蛋黃醬，作為豬扒嘅配菜好合適。呢度嘅待應都好nice，好好咁介紹每個菜色，都會問我哋意見，有機會一定會再去。