El Portal (已結業)

嗰日收工同朋友行過廟街，跟住就睇到呢一間食地中海嘅餐廳，跟住上去睇吓，上到去環境好優雅，俾人一種好relax嘅感覺，入面有好大塊玻璃，望出去見到廟街嘅牌坊。跟住入面老闆走過來介紹餐廳嘅特色，原來設計呢間餐廳嘅原意係牌坊好似一道門咁，打通中西文化嘅合璧，入邊係廟街，代表中國，另一邊喺柯士甸道，代表西方，老闆希望透過呢間餐廳，俾人可以接觸到中國同西方嘅美食。餐廳裏面都有多種地中海嘅菜式，我哋坐低叫咗兩杯酒飲品，望住出面嘅環境，一路飲嘢，所有工作嘅煩惱同疲勞都消除，然後睇一睇餐牌，每日都有唔同嘅菜式選擇，就揀咗地中海嘅特色餃子。餃子皮係炸出嚟嘅，出面黃金鬆脆，裏面嘅肉，亦保持鮮味，名副其實嘅中西合璧，出面好難食得到，值得推介。另外仲叫咗不同國家嘅生蠔，嗰啲生蠔亦都配唔同嘅汁來點，有啲係大隻質感，有啲就比較細隻但鮮甜多汁，係依度可以嘗試到不同地方生蠔。總括而言依度係一個唔錯嘅地方，可以上嚟飲下酒，放鬆一下，亦可以上進地中海嘅美食，值得推介大家。