睇過menu見omakasa都有兩種, 於是兩種都叫嚟試吓.
首先上旬前菜, 有溫泉蛋同鰻魚漬, 溫泉蛋比較普通. 鰻魚本來比較厚重, 但細細件配合海草同啲汁一齊食酸酸地好開胃.
刺身盛三種有拖羅, 劍魚同沙甸魚. 拖羅同劍魚肥美, 入口即溶. 沙丁魚係時令菜式, 通常喺中秋前後先有, 沙甸魚刺身混合左蔥粒好肥美好鮮味.
季節清湯有淡淡魚味, 飲完令人覺得好舒服. 可以預備品嚐之後菜式.
半燒鹿兒島A5和牛, 輕輕燒過肉質嫩滑, 咬下入口即溶, 而且感覺並不油膩, 牛味香濃.
季節燒魚有燒油甘魚魚鮫, 魚鮫黏著不少魚肉, 魚肉肥美, 魚油甘香.
季節天婦羅有野菜, 苦瓜同大蝦. 新鮮食材包裹著酥脆輕盈麵衣, 那有唔好食道理.
時令壽司有火炙帶子鰹魚同赤木, 壽司食材新鮮, 用火輕輕燒過帶出鮮甜味.
最後白桃雪芭為今晚劃上完美句號.
