樂園 (已搬遷) 新店位置

呢款廚師發板餐總共有9款食材，啱哂我呢啲乜都想食下，但又唔想食得太飽嘅口痕友。佢大份到足足霸咗大半張枱，好誇張，就好似一個畫板咁，利用食物嚮上面作畫，每款食物嘅擺位都諗過度過。為咗唔好浪費大廚嘅心思，我就梗係要幫佢影返幾張靚相啦！不過影到不知時日過，搞到侍應要過嚟提我地「凍咗唔好食架」，好細心體貼。佢仲建議我地要食咗邊幾款先，先食清淡嘅海鮮熱盤，再到濃味少少嘅，最後再食冷盤～牛油帶子滋味爽口；香煎虎蝦爽脆鮮甜；香煎安格斯牛柳粒厚肉多汁；煙三文魚鹹鮮適中；鵝肝多士大大嚿入口即溶；榮螺同蟹棒味道清新；最後再食埋隻烈酒布冧，酒味其實一啲都唔濃烈，仲有去油膩同消滞嘅效果添！除咗廚師發板之外，我地仲另外點咗一款香煎龍膽石斑柳配奶油翡翠汁～估唔到佢嘅擺盤都一樣落足心機，唔單只石斑柳本身嘅賣相吸引，大廚仲畫咗隻好qq嘅貓仔嚮隔離，抵讚！總括嚟講，餐廳嚮菜式嘅配搭同賣相都落咗唔少心機，食物質素亦都唔差，幾適合慶足生日／特別節日。