禮 (天光道) (已結業)

刺身盤，共有4款刺身，其中最有驚喜係鮑魚，因為比較少見，而且唔需要點醬油已經好夠味，其他刺身鮮甜肥美。芝士玉子燒，內裏用芝士做餡，夾起即有拉絲效果，趁熱辣辣食就最完美，玉子有蛋汁非常滑，個人建議食一件再食一小啖蘿蔔蓉解一解芝士既膩感，之後再食下一件。鹹蛋豬肉棒，豬肉相信係經人手打出來，食落口感軟綿，頂層醬汁係店鋪自家調製出來既鹹蛋汁，隱若食到有芥末味，味道好夾。脆皮風鱔，這個風鱔真係燒得唔錯，表面燒至乾身，但咬落其實好嫩滑，而且肉身好彈牙，皮好香脆，本身師傅已經曬上海鹽，所以已經夠晒味。生蠔，肥美大隻鮮甜飽滿，醬汁亦都係自家製，味道酸酸尾尾好開胃，橙色一粒粒並非蟹籽，而係一種調味料，帶微辣，第一次食到這食法，算係幾新穎特別，我覺得唔錯。