侍元 (已結業)

今日做完gym收工返屋企，未食飯就係海之戀出口出搵下野食啦！見到e間侍元拉麵新開張，又幾多客人咁，於是就試下啦！望下個餐牌就主打拉麵，有豬骨湯，黑蒜湯同埋辣味湯。我就選擇左個黑蒜湯，另外叫左個餐跟泡菜同埋凍檸檬茶，價錢都係68蚊，好抵食，等左一陣左右就響機有得攞啦！個麵賣相唔錯，配菜有木耳，粟米粒，一塊叉燒同埋半隻蛋。試下個湯先，醬油味道都幾重，而且都有黑蒜味道，但就唔係好夠熱，隻蛋就係全熟，無咩特別，麵條餐廳就選用左曲麵，煮嘅時間控制得幾好，好彈牙，而且份量都夠多，我一個大男人都夠飽。跟住到配菜，泡菜份量就少d,但係味道都可以，都幾開胃。到檸檬茶啦！唔知點解堂食都用外賣膠杯，唔係幾環保，但係餐廳又跟返個紙飲筒俾你，感覺就真係怪怪的。但係反而有個驚喜位，杯茶都幾好飲，好香茶味，最後就湯都飲埋啦！幾抵食，會再幫襯。