元気寿司 (荷里活廣場)

尋晚去左荷里活廣場行街, 行到五點九左右就決定早D食晚飯, 怕晏D食會等位, 點知黎到呢間元氣高速線已經見到有D人等緊位....我地兩個人拎完飛都仲要等大約十五分鐘先有得入...六點未夠已經要排隊 呢個場真係好旺下! 入到去發覺呢間高速線有上中下三條路軌, 點餐既平板位置有D特別, 掛在每個位既右上角, 感覺怪怪地, 我覺得放返低D會舒服D. 

雖然全店爆滿, 但送餐效率都唔慢, 所以D食物都好似幾新鮮. 叫左油甘魚, 鰻魚, 火炙三文魚, 帆立貝, 牛肋骨, 吞拿魚蓉壽司, 仲有鰻魚芝士卷, 各款既味道都唔錯, 只係兩件帆立貝既色水唔係好靚, 望落比較暗啞D. 

不過我留意到呢間高速線送餐既只係一個盤, 之前去太子始創果間食係一架車㗎 (但其實都冇乜所謂lol)....另外原來而家D壽司碟隻隻都有句鼓勵句子, 都幾得意吖. 埋單二百二十幾蚊, 價錢都同其他壽司店差唔多.