流水蝦 (已結業)

咁今日同事介紹去觀塘呢一間食流水蝦， 咁其實都係佢自己發掘嘅，咁就信佢啦，上到去見到有幾條河水道， 感覺都幾特別因為 有別於以往我食開嘅餐廳。餐廳設有多條流水道放滿新鮮嘅大蝦比大家夾， 咁其實自己第一次試流水蝦，啲蝦都幾生猛仲跳跳紮 ，煮完之後其實真係食到新鮮嘅蝦， 而且我自己覺得D肉都幾甜。一坐低店員先會幫我地燒一堆鹽蝦同送上海鮮拼盤及 一堆牛肉拼盤， 咁其實個蝦都幾好食幾鮮甜而且佢哋醃製嗰啲蝦 令到啲味道更加出， 而且佢哋啲牛嘅質素都唔差， 雖然唔知係韓牛定和牛， 但係佢啲牛肉都好有牛味， 而且juicy。 當然 不得不提佢個海鮮拼盤有我最鍾意食嘅鮑魚， 鮑魚真係幾好食。入口旁設有自助吧，放滿不同嘅海鮮多款，包括有一D串燒魷魚及各式各樣肉類蔬菜~雞牛豬樣樣都有得揀。 咁自己建議可以食多啲魷魚，因為當燒起上嚟嘅時候 感覺上有啲似泰國啲烤魷魚。 同埋佢哋都有提供啲丸類畀大家燒烤，大家可以燒下啲丸丸同埋雞翼等。最後仲設有雪糕櫃有多款種類同味道嘅雪糕可以選擇， 另外建議大家可以食下啲水果順便清下熱， 因為佢都有啲新鮮嘅水果提供例如西瓜同蜜瓜。