饞。台式食堂 (如心廣場二期) (已結業)

今日同老公去咗如心廣場叫外賣食晚飯，行嚟行去都唔知想食咩，想平平哋食但係又唔想食頹野，最尾行過呢間台灣野見到有老公鍾意食既藥膳排骨飯就決定食呢間。老公叫咗藥膳排骨飯配爆米花仙草奶茶，我叫咗紅燒燉牛腩配檸檬冬瓜茶。外賣等咗唔係好耐，大約10分鐘就攞得啦！返到屋企即刻開嚟食，啲嘢食都仲係好熱辣辣，仲聞到好香嘅藥材味！佢仲有送個開胃菜，應該係酸辣嘅白菜，我自己覺得有少少辣，但係老公覺得好好味，食晒兩兜。到主菜啦，個藥膳排骨飯都好重料，望落成兜都係藥材同排骨，但係湯底有少少唔夠味。而個牛腩就好濃味啦，啲肉又好多又好嫩，一啲都唔硬！飲品方面個檸檬冬瓜茶有驚喜，甜甜地又酸酸地好解渴，但係個爆米花仙草奶茶就甜得滯，飲落好重奶精味！相比之下我會推介檸檬冬瓜茶多啲啦兩個餐加埋都唔使$200 ，仲有一個鐘停車場送添！