常得館米線 (已結業)

今年無年三十晚，就變左年廿九放早，放左工去食啲野先返屋企啦，大部份舖頭都預備收早，我地衝咗入一間米線舖叫常得館，夥記話佢哋預備早收，但係做埋我哋生意先啦。咁就快快坐低落單叫嘢食啦，點知我哋落完單之後又有4、5個客衝咗入嚟話附近已經冇嘢食，哈哈，夥記話唔好意思趕人走，於是全部都煮埋先至收爐。等緊食嘅期間望下四周，一開始都知呢間米線舖係食辣嘅，但估唔到枱面都仲有幾款辣椒醬，辣湯底再加辣椒醬咁犀利？朋友唔係好食辣就叫左碗常得牛肚米線，咁佢呢碗米線係清湯底，湯頭都幾甜，牛肚分量正常，煙韌有咬口，仲撘條生菜顏色幾好睇。自己嗰碗就叫咗泡椒肥腸米線，個湯底一望就知辣啦，成碗嘢都係紅色㗎～湯底雖然話幾辣，但辣得嚟又好鮮味，唔係死辣嗰種，啲米線浸浸下仲變埋做粉紅色㖭，但呢個辣味愈食愈上癮。至於啲肥腸真係幾肥，咬落好有口感，索咗辣油好正。米線分量多，煮得淋得黎都幾爽口，加埋生蒜又真係幾好味。食辣野就梗係要返罐王老吉，特別夾㗎，哈哈。夥計話新春期間照常營業，但會係新春價，米線、小食同飲品都會加啲，不過新年流流都預左啦。