兩興潮州海鮮飯店 (已結業)

忙左成年，終於可以有個長少少的假期。年三十朝早同事已經搞埋手尾歸家團年，剩番兩個鬼佬孤伶伶的，於是就同佢地和另一個無家可歸的女同事在這裡吃圍年午飯﹝其實無家可歸的仲有本人！﹞。這裡其實有兩個入口，與文咸西街那邊前後相連，屬同一間舖，據觀察正門應在文咸西街而非皇后大道西。估唔到呢度都唔係太多人，前一日同事打電話來都訂到檯。先渴功夫茶再點菜，我們叫了石榴雞、鵝腸拼墨魚紅腸、沙茶牛肉炒芥蘭、煎蠔餅同方魚肉碎粥。石榴雞一客四件，剛好一人一件，係蛋皮包雞粒，整得好似個荷包，賣梳幾掂，好得果兩個鬼佬歡心，而味道亦係幾好的；近農曆年非鵝的當做期，鵝片味道必定麻麻，反而鵝腸爽又美味，加埋墨魚送啤酒就至適合；沙茶牛肉炒芥蘭埋沙茶醬大堆到嚇人一跳，幾難至搵到牛肉，我就不太欣賞；煎蠔餅仍有水準，但不太出色，始終是煎得濕了一些，還是喜歡已結業的灣仔新星那些炸蠔餅；方魚肉碎粥味道不錯，不過食完都有點口渴，又要叫多支啤酒止渴！連啤酒三支，埋單三百幾，唔算太貴，始終有點行頭的潮州食肆都要收番咁上下價錢。