古早味休閒台灣 (已結業)

同小白兔行開旺角，有店員派街招。原來係食古早味台灣菜，睇落門面都乾淨企理，一於去試下。上樓梯先去到餐廳，裝修都唔錯，幾別緻。原來樓上都幾大，目測有100個坐位左右。我哋揀咗卡位坐。睇下餐牌先，有好多經典台灣小食農家蓋飯， 估唔到材料咁豐富， 原來係一碗大魯肉飯，上面再有鹽酥雞，台式香腸， 煎鯖魚， 蛋菜等。鹽酥雞炸得好香口， 粉唔硬，咸度適中。 靖魚煎得幾好，唔會腥味。家常燒茄子, 原本以為原條上燒茄子。原來係燒完後，同白菜一齊上枱，變成一個小菜。燒過的茄子外層有少少脆， 再兜返個芡汁，好入味。宜蘭卜肉, 原來係炸豬肉條。粉薄薄一層，炸粉薄而帶少少甜味，有點似平時食炸旦白的外層。 豬肉新鮮，帶少少肉汁。