漁樂 (禾輋廣場) (已結業)

朋友話我知沙田禾輋邨有好味泰國越南菜食，今日見得閒就特登去咗揾食。在禾輋商場揾咗一輪都揾唔到，要去詢問處問職員先知要搭電梯上一層才見到，地點都算隱蔽。睇吓餐牌，價錢非常大眾化，初次幫襯，就試吓午市套餐嘅越香什錦河同飛天通菜炒豬頸肉配飯。越香什錦河湯底香濃，有牛肉，扎肉，牛丸，豬肉丸，材料好足，河粉份量亦好足夠。至於飛天通菜炒豬頸肉就略鹹喇，而且豬頸肉只有薄薄數片，好彩炒通菜鍋氣好夠，份量足夠食完一大碗飯。套餐仲送一杯飲品，亦可加3元改配汽水，以咁嘅價錢，都算好抵。