滿屋日本料理 (大鴻輝(荃灣)中心) (已結業)

最近同男朋友講起，好似真係好耐無食過放題了，所以就決定近近地去屋企附近既放題食下！揀左荃灣呢一間滿屋。入到黎都幾旺場，見到點菜紙都有好多野食啊！除左點餐紙上面既野食，出面仲有自助區，有好多款唔同既野飲，仲有好多小食同冷盤。食放題首先梗係食左刺身先啦！我地各樣都叫左幾片，當中比較驚喜既係佢竟然有帶子同埋油甘魚腩！刺身都好新鮮，就算好多人叫都唔會有未溶哂雪既情況出現。另外佢既甜蝦唔係得好細隻個種，係大隻連埋頭既，好鮮甜，encore左！特別要推介下既係呢度既壽司，佢有好多款唔同既創作壽司都係好好味。完全估唔到係放題會有既quality，：值得一讚。卷物亦係非常有特色呢！特別推介明太子玉子壽司同埋左口魚裙邊。熟食我地都叫左好多，牛油粟米好香甜；鹽燒鯖魚火侯剛好，而且油脂豐腴，係高級既味道。另外燒牛舌串燒都好味！值得一提既係呢間放題會送Movenpick雪糕，好少放題會咁大手筆，以呢個價錢黎講我覺得性價比好高呢！九點半後入座，只係$220一個人。