晚市2人套餐B，有一個湯、兩個小食、兩個菜、一個例牌海南雞、兩個飯、同埋兩件甜品。 咁多嘢食都只係$298，確係好抵。同埋份量其實三個人食都足夠。
冬蔭功湯
湯有豬肉丸、大蝦同雜菌、都算係幾足料。湯嘅味道好好，但如果可以再辣少少就更好喇。
酸辣鳳爪
食酸辣鳳爪，我最驚就係太過辣。泰潮嘅酸辣鳳爪就剛剛好。而且鳳爪就住每一隻趾位剪開咗，一口一條，唔會話多咗幾隻趾會食到成咀都係。
泰潮海南雞
泰潮嘅皇牌菜，雞好滑好香，又唔見有脂肪。連埋雞皮入口完全無罪惡感。點埋海南雞用嘅醬汁，提升海南雞嘅味道。再配埋雞油香飯一齊食先係皇道。
雞油香飯
有得揀香油雞飯，當然會叫依個啦。粒粒飯都係金黃色，充滿住雞油嘅香味。可惜嘅係唔記得咗個2人套餐有招牌咖喱。早之應該叫一個雞油香飯、另一人叫絲苗白飯。
泰式炸蝦餅拼春卷
雖然單碟嚟睇份量唔算太多，但以整個2人套餐嚟講，其實就好足夠喇。蝦餅彈牙有蝦味。春卷就係齋春卷嚟，變咗唔會食太多肉，相對比較健康。
招牌咖喱
招牌咖喱可以點配牛筋腩、豬頸肉、或者雜菜。我哋點咗配豬頸肉。咖喱非常之香、同豬頸肉都好夾。豬頸肉好鮮嫩。唯一可惜嘅係我哋兩個飯都點咗雞油香飯，早知應該一個雞油香飯、一個絲苗白飯，咁就唔會浪費咗咁香咁好味嘅咖喱喇。
泰式蒜蓉炒雜菜
蒜蓉味好夠，係依一餐嘅蔬菜主要來源，整份菜都好好味道。
泰式甜品
甜品係兩件細細嘅椰汁糕、清甜好味。幫依一餐劃上完美嘅句號。
