瑞士農場 (已易手) 新餐厅

以農場為主題o既餐廳，裝修都幾好，一邊係紅磚牆，一邊係五顏六色o既木條，營造務農粗獷o既感覺，但又帶點生氣。長條形o既內籠，右邊係卡位，但係左邊好奇怪，係一整排面朝中間o既單邊位……可能原先設計係想做雙人檯但最後發覺窄得滯掛。叫o左兩個精選午餐，聽職員講，大約一個月轉一次menu。午餐either 跟湯或者o野飲，紅湯好甜，ok 濃稠o既唔錯，但係奶茶唔合格！佢一上我見佢咁深色已經知唔掂，果然太慳喇俾得太少奶好澀囉，同埋杯茶唔夠熱。洋蔥豬扒飯(跟餐$44) 塊扒比較實，唔夠鬆軟，但係唔會話好乾身，都ok o既。瑞士汁金菇肥牛飯(跟餐$44) d 汁分開上俾你自己隨意點，就算唔落d 醬本身d 金菇肥牛卷都煎得幾甘香，整得幾好食，落埋d 汁就更加惹味，有剩仲可撈飯添，不過始終略嫌d 瑞士汁唔係好夠杰(and hence 甜)。另外每個飯都會附送一咋水灼生菜同雜菜，係幾健康o既~d 職員真係好有禮貌，小心前唔該後咁。餐廳無加一，generally $40 幾蚊都係講緊平價西餐，唔可要求太多，呢個價位有呢d 貨色都合理的。