Oui Oui Bistro (已結業)

上網睇佢資料，知道佢地由法國藍帶大廚主理，即刻感觸良多，因為當年接受過一位法國藍帶嘅世界御廚指導，感覺好似返回多年前難忘嘅學習年代。長沙灣居然有間法國餐廳，感覺好特別。餐湯點咗法式洋蔥湯，一客龍蝦扁麵條，5成熟肉眼。洋蔥湯望上去以為好淡，原來係錯覺，湯味出奇地非常濃郁。湯面上再放上一塊加咗芝士嘅法式麵包，噤嘅處理方法都係第一次見。扁麵條軟硬適中，龍蝦肉新鮮彈牙，龍蝦汁唔會太濃搶哂味。肉眼會好似美式牛扒噤，有好多黑椒汁，只係落咗少少鹽吊味，所以肉味好夠，食落肉汁都好足夠，肉質亦都好鬆軟，唔錯。最後一提，佢地有個好靚好乾淨嘅廁所！