同朋友一齊點咗雞絲拼札肉湯粉($50)，有3片札肉，仲有大量雞絲，非常豐富，配上特色嘅香葉，清新怡人。而且河粉嘅份量好多，幼條薄身，好爽滑，又唔油。依碗粉一個人食應該會食到好飽！
我地再叫咗法式肝醬豬扒三文治($50)，足足有2個手掌咁長！法包好厚，外脆內軟，一定要即上即食先唔會辜負佢嘅脆嫩。香茅豬扒煎得金黃色，非常香口，又唔肥，重要嘅係長度同法包一樣，唔會話齋食個包而食唔到豬扒。除咗豬扒，仲有大量紅蘿蔔絲、青瓜絲、洋蔥等等作為配料，非常健康。
仲有小食越式蒸粉卷($40)，即叫即蒸，上菜嘅時候熱騰騰，望到都流哂口水。粉皮薄身，上面灑上炸蒜，入面包住紅蘿蔔粒、冬菇等等嘅餡料，足料，又有口感！
晚市特飲只係加$11，我點咗椰汁三色冰，有紅豆、綠豆、椰汁條，色彩繽紛，重點係椰汁味非常濃，啖啖都係椰香味~
