校長燒肉日韓料理 (沙咀道) (已結業)

今日咁啱想食下燒肉，就同朋友黎食下呢間出名性價比高嘅校長燒肉。我哋食黃金時段，除左燒肉之外，仲包埋火鍋同刺身。一坐低就先去睇下自助區有咩拎，除左各種肉類丸類之外，仲有熟食、壽司、沙律、點心等等，真係好少會喺放題見到點心，而且味道都唔錯。至於雪櫃嘅飲品款式都好多，最特別嘅係竟然有支裝維他奶，唔飲凍嘢仲可以自己沖花茶飲添。燒肉方面選擇好多，我哋食左好多款唔同嘅肉同海鮮，當中覺得牛柳粒、豬頸肉、魷魚鬚最好食，encore左幾次。食肉食到滯仲可以燒菠蘿，超級好食。燒肉嘅同時，仲可以打埋邊爐添。我哋揀左麻辣鍋+壽喜燒鴛鴦湯底，淥下蔬菜、丸、響鈴等等，食啲菜解膩就啱晒喇。食到最尾就食下甜品，有唔同款式嘅雪糕、雪條、啫喱、布甸等等，都試左好幾款。最估唔到係啫喱竟然有意外之喜，比一般嘅放題食到嘅好味。總括黎講性價比真係幾高，食物款式多，而且味道唔錯，有機會會回訪。