宮葉 パフェ (已結業)

不嬲都聽人講話觀塘多野食，今日行過見到晚餐既價錢幾平民，甜品又好靚，就決定食呢間啦。一入到去覺得裝修幾企理，好有日本和風既感覺。牛肉親子丼（配麵豉湯）牛肉親子丼既份量一啲都唔少，男仔食絕對夠飽肚。滑蛋鋪滿成個飯既面頭，半熟既蛋充滿住蛋汁，真係名乎其實好滑，仲帶有少少湯汁既鹹香，好惹味。牛肉一啲都唔會話太嚡或太韌。飯有好多汁，撈飯食就最啱。見到menu入面既甜品咁吸引又點可以唔叫喎。日式精選乳酪芭菲賣相好靚，有口感煙韌既日式小丸子同蕨餅，紅豆蓉同朱古力脆餅。抹茶雪糕好rich，抹茶味突出，甜度適中。下面仲有脆米通，抹茶啫喱同火龍果，配料豐富，抹茶控一定要試。藍莓芝士餅雪糕芭菲一黎就覺得真係好大杯，上面真係插左一大舊藍莓芝士餅係到，仲有雜果同馬卡龍，好足料。雲呢拿雪糕同藍莓醬配埋一齊食酸酸甜甜，味道幾得意。食左咁多野到埋單都只係$200仲要無加一，真係好抵。而且呢到既甜品真係做得幾出色，絕對推介。