三分俗氣 (已結業)

今日去完新蒲崗探朋友，順便一齊食下飯，因為好耐無去新蒲崗食嘢。住係新蒲崗的友人介紹，話區內有一上海菜，頗有質素，全因爲佢係上海人，就相信佢嚟一試。入到去先點一個「砂窩雲吞雞」半隻，朋友推介呢個係必點之選。上枱見雖然是半隻份量，但都一大窩，有半隻雞、有金華火腿、津白、上海菜肉雲吞，湯底頗濃。叫咗小菜「糖醋魚塊」魚塊肉厚，醬汁不錯，有大量菠蘿，正合我意。仲有最愛的「炸銀絲卷」配上煉奶，當甜品食都得。嚟上海舖另一必食係「韮皇炒鱔糊」，做到汁濃加上鱔糊數量多，好味。飲品有「咸檸七」檸檬夠咸，加上七喜，真係夏日之選。