泉記金喜來海鮮飯店 (已結業)

自助火鍋，任飲樽裝汽水，平日星期一至五 $110(位)，星期六、日$140(位)。近幾日開始涼，打邊爐就最正，今日同幾個朋友去柴灣街巿打邊爐，貪佢夠平夠抵，選擇又多，絕不欺場。每檯送上一份海鮮，上次嚟送蟹。今次係大蜆，比較少見，次次都係送蟹的較多。每隻蜆都有我手巴掌一半大細。我地揀了駌盎湯底(清湯VS沙嗲)，大家急不及待出去攞嘢食。個個都餓到忘形狂食，所謂相機食先早已抛諸腦後。肥牛雪得好凍，夾上碟等好耐都未溶，分唔開。好彩我地人多，乾脆將一碟肥牛全放進鍋內，煠煠煠煠~~~~~，慳番唔少等解凍嘅時間。生蠔隻隻睇落幾飽滿，味道比想像中新鮮，以為任食，應該麻麻地唔多新鮮。第一轉，都唔敢攞太多，預番一人2隻，試過後當然大碟大碟攞咗兩轉。細蜆不過不失，以$140任飲任食，算係唔錯。鵝腸都唔失禮，唔會全部肥膏。墨魚仔每次煠到過熟，未試到是否新鮮。其他的菇、魚蛋或龍蝦丸都過得去。菜，比外面任食火鍋新鮮同嫩好多。當晚，氣氛夠熱鬧，同朋友嘻嘻哈哈愉快地渡過一晚。真係抵，值得推介。