越南咖啡室 (已結業)

今晚嚟到觀塘搵野食，見到呢間越南咖啡室，有一段時間無食越南野，一於入去試下。入到去見到環境佈置得幾有越南風，屋邨商場嘅餐廳嚟講叫好好嫁啦！叫左兩個無骨海南雞飯，一碗馬拉盞炒通菜，同一杯倒立青檸薄荷梳打特飲。首先海南雞飯嘅飯夠油，食落都有淡淡雞油香，但感覺唔係太新鮮。雞塊其實唔係全部無骨，係大部分，但呢點就算啦，無咩所謂。主角雞完全無雞味，一定要點醬先食到，雞亦唔滑，食落覺得好老。另外，芥蘭菜係就咁水煮，亦係乜味都無。整體嚟講，成個飯，得個醬好食。叫呢個倒立特飲係想試下薄荷加青檸同雪碧嘅味道。倒立除左特別之外，另一用意係避免太多汽水接觸冰，冰溶得太快，一下子溝淡哂。飲落好重薄荷味，同雪碧幾夾，味道好新鮮。但如果怕薄荷果太重嘅朋友應該會覺得太多薄荷味，所以可以成枝汽水倒哂都無問題！馬拉盞炒通菜終於有返驚喜。同平時好食嘅泰國餐館炒嘅通菜好似，味道夠，通菜亦保持爽脆。呢碗菜係成餐飯最好食的！埋單大約一人一百蚊到。