北京拉麵店 (已結業)

剛過咗嘅禮拜我可以用兩個字去形容：平凡。天氣唔凍又唔熱、天色唔晴又唔雨，去打波由於太耐冇打，打得唔太好又唔太差。打完波成個人又唔係太攰，不過五臟廟已經呼呼作響。朋友提議話去旺角附近食北京嘢，佢據聞呢間店舖已在該區開業有一段日子，响當區嚟講都有啲口碑。由於我地要急於祭五臟廟，响冇其他更好提議嘅情況下，就下咗決定。呢間店舖嘅內部裝修富有(或扮富有)傳統特色，餐牌上所顯示嘅都係一啲廣為人知嘅北京小食(有啲好似唔係)同埋菜色。我地五個人七嘴八舌咁點咗小籠包、鍋貼、紅油抄手、淨雲吞、排骨拉麵、担担麵同埋西蘭花。先講辣嘅嘢，無論係担担麵抑或係紅油抄手，都唔係話整得好辣。雖然咁樣整法比較啱大多數人嘅口味，但係就失卻原有菜色嘅風味。例如紅油抄手咁，同將淨雲吞撈落紅油抄手一般，係完全食唔出有咩嘢分別，証明紅油抄手嘅雲吞仲未話好入味。担担麵醬較稀，撈勻之後冇乜香味。至於小籠包及鍋貼就合格，咬入口都可感覺到內裡肉汁四溢，肉汁都頗豐富嘅。排骨拉麵就冇得食，因為俾其他人食晒。埋單總共一百七十二蚊，論價錢就一啲都唔貴喇。不過整體感覺都係比較普通，呢方面就已經拉低咗唔少分數，所以我都唔敢响度大力推介呢間食店。