薩莉亞意式餐廳 (已搬遷) 新店位置

其實成日都當呢度飯堂，由以前20蚊個飯食到宜家27蚊，但都無阻我對佢既熱情。呢間野係勁大眾價錢，份量不多，但無加一，樓面都好大，不過由於大多人幫襯，星期五六日晚一定要排隊，所以我就揀左買外賣番屋企食。一般order完要等15至20分鐘，如果好彩就有位比你坐住等，但若果太多客就會連收銀前面個幾張比人坐住等既椅都無埋。講下堂食，呢度係每張枱都有個鐘仔，order食物時用，埋單自己行去收銀，野飲方面係有drink bar不過一叫就要成枱人都要加，環境方面，樓底好高，附近係大型補習社兼呢度價錢平所以都好多學生哥幫襯。好啦，我今次叫左一個焗飯加雞翼，加埋46蚊。先講雞翼，焗得岩岩好，微辣，必叫但以前質量好啲，唔知係咪宜家太多人幫襯，雞翼每次叫都越黎越細隻.如果多人食可以叫8隻。呢個飯同一開張個陣係有啲改良，以前係無茄汁底，宜家啲飯係有茄汁再加佢地既特色，落奶再焗。比較膩，但又好吸引，因為十分之香，如果鐘意食較濕既飯，呢個絕對係不錯選擇。