竜王居酒屋 (已結業)

今日到北角附近做野，完左之後就打算到附近搵間餐廳，好好慰勞自己。見到依間係啱啱新開嘅餐廳，裝飾同日本居酒屋好似，估唔到佢又抵又好味。什錦魚生沙律同平時居酒屋差唔多，魚生都落足料，唔會只有寥寥可数嘅魚生，食落都好新鮮，唔似餸頭餸尾。魚生配上酸醋同沙律菜非常開胃，份量都算多同抵食。竜王卷就一定要點，係一個好有份量嘅卷物，材料有好多，成碟非常抵食，同時有好值得打卡嘅青龍碟。上菜嘅時候就聞到好香嘅卷物味，紫菜飯卷裡面係炸蝦同青瓜絲，面頭鋪滿鮮美吞拿魚蓉同魚油甘香嘅三文魚子，口感好豐富。雖然佐賀名水豚白湯烏冬份量唔算好多，但好好味。原來佢地嘅烏冬係用竹炭整嘅，非常特別。豚肉係半肥瘦，肉質好嫩滑，肉味非常濃。幾鍾意佢嘅湯底，係豬骨湯底，飲落幾鮮甜。海綿玉子係店員推介嘅食物，佢只係用雞蛋整成，冇落任何麵粉。佢嘅賣相同平時食開嘅蛋糕相似，但佢比蛋糕更加濕潤輕盈，空氣感十足，仲有海鮮嘅咸香味。平時串燒都好鍾意叫牛舌，牛舌燒得唔錯，爽脆多汁，嚼勁十足，size大細啱啱好。