Walter Bistro (智選假日酒店) (已結業)

今日放工約了男友喺觀塘食自助餐。原來餐廳做緊優惠，第二個人半價！四個人仲可以其中一個免費添啊！所以決定難得平日都去食個自助餐先。一坐低，餐廳就提供咗燉湯 ─ 花旗參瘦肉湯，雖然我好少食花旗參，但都好易入口，而且非常滋潤，好適合轉季嘅天氣。自助餐前菜都幾多選擇，除咗parma ham配芝士，各類嘅沙律，仲有好多凍海鮮選擇。當中我食最多係麵包蟹同螺肉，非常鮮味！另外，我地可以搵店長幫忙即切西冷牛扒，大概都有七八成熟，再配埋醬汁，都幾juicy。即開生蠔都係佢哋嘅賣點之一，店員特別介紹呢度嘅法國生蠔，雖然size唔算大，但勝在濃濃嘅海水味，但最後又鮮甜，食完再食！其中最驚喜嘅就係竟然有大閘蟹食呀! 適逢秋天當造季節，每人都有一隻大概三兩半嘅大閘蟹。雖然細細隻蟹肉唔多，但一打開蟹膏依然滿瀉，非常滿足。可能因為平日關係，甜品嘅種類唔算多，我自己就試咗個朱古力蛋糕同曲奇餅味雪糕。蛋糕唔會太死甜，朱古力味都幾重，值得一試。