魚塘鴨子 (已結業)

舊同事生日飯，佢花名叫『鴨脾』，所以揀返間食鴨嘅配合主題。哈哈哈一圍枱五個人，安排咗坐樓上二樓靠近窗邊落地玻璃位置，幾好！ 對唔住，我遲到，所以大家都叫好晒餸啦！當中招牌片皮鴨係必選嘅，鴨皮脆卜卜㗎，仲有細心位係白色皮逐片逐片用紙隔開呀，而配菜多番啲就好啦！跟住嚟個辣雞，對於唔係好食得辣嘅我，呢個辣度係可以接受嘅，加上佢好香麻油味，反而令我愛上咗佢。跟住嚟多個辣辣嘅水煮魚，成盤辣椒咁送過嚟，嚇死寶寶啊！點心叫咗三色餃子，紅色綠色白色各兩隻，真係手快有手慢無，我最後剩返白色餃子，有啲啲失落咗。但佢哋話紅／綠嘅味道無特別，仲唔係好食得出係咩特別餡料。想感覺健康啲，叫返個菜嚟食下啦，於是點咗蟲草花菜苗，清清地有夾雜咗啲菇（仲可以考慮下返屋企叫媽媽得閒煮比我食）。未夠飽叫多個香芋海鮮焗飯，擺盤算係叫特別啲，木板上放上煎 pan，但食落似白汁焗飯多啲，重點係我食唔到芋頭！ 一共叫咗五個餸，加咗支紅酒，自備生日蛋糕收咗我哋切餅費，除返開每人 $350 左右，都算合理啦！後來發現原來佢同『美中。鴨子』係隸屬同一飲食集團，唔怪得知有啲類似，好彩係一樣咁好味！