叙福樓金閣 (已結業)

懷舊酒樓早已買少見少，見社交平台消息話敘福樓不獲續租做到月中，趁尾牙去支持吓。午市正價時段仍一如既往聚集咗唔少街坊等位，無嚟一排，食物質素進步返唔少。每次嚟都會食佢哋嘅豬腳薑，大大碗好足料。薑夠大塊入味，吸滿酸甜適中嘅薑醋汁，愈食愈暖胃；豬腳大大件，皮肉晶凝彈滑，一咬就食到滿滿膠質，好滿足。少數我覺得炸得出色嘅芋角！外層嘅蜂巢鬆脆鬆化，絲毫不油，無油抑味，抵讚👍🏻芋頭同樣鬆軟，包住豬肉、菇粒等，鹹香除去炸物嘅膩，入口更香口；豬肉係粒狀而唔係肉糜，仲食到落咗菜莆，兩樣加埋好有咬口🤩燒賣比以往更大粒，可能收爐大酬賓😂餡料幾飽滿，正常水準。香港地無幾多間酒樓仲好似昔日咁，要拎住點心紙出去追餐車攞熱辣辣點心。希望唔係結業，而係另覓租舖啦。