名館 (希慎廣場) (已結業)

來到銅鑼灣覓食，試下呢間中菜餐廳，環境開揚乾淨，枱好闊落， 坐得舒服， 好適合同屋企人慢慢食。四季椰子雞肉湯 $68造型好得意用功夫茶煲來上， 裏面亦都好足料，有椰子，烏雞，瘦肉，紅棗，煲得好夠火喉，滋潤好飲。黑松露翡翠炒帶子 $138必食之一，係我最鍾意食。黑松露味好香唔會蓋過帶子嘅鮮甜味，帶子炒到岩岩好熟， 好彈牙，有6大粒。翠玉瓜都好爽脆。冰鎮鮮菠蘿咕嚕肉 $138賣相已經好吸引，好似雲上的金菠蘿。 咕嚕肉細細件一啖一口，冇肥肥肉，但冰鎮效果唔夠脆口。菠蘿好新鮮，非常juicy，酸甜冰涼。流心鵪鶉蛋燒賣 $48大大粒，口感比較紮實， 有蝦肉，豬肉，冬菇，但中間粒鵪鶉蛋已經熟啦，做唔到流心效果，哈。豉油王頭抽飯焦蝦 $118豉油王炒飯超香，愈食愈惹味，唔會太鹹，仲有粒粒脆口嘅飯焦，好有口感。 調味啱啱好，食得出蝦既鮮甜味。大大碟，份量好多，岩3至4個人食。