添好運點心專門店 (已結業)

放假飲茶午餐，食過一次，不過呢度之向都好多人排隊。唔係個朋友話未食過想試吓都唔會再排隊，今日時間可能早，所以等咗大概10分鐘就有位啦。入到去梗係坐到爆曬啦，要搭枱，再搭搭枱，感覺其實坐得唔係咁舒服。食嘢來講佢嘅選擇唔算多，只不過係10幾款，但係以價錢來講的確係要酒樓平啲。講味道，今日就叫唔多，你話特別好食要叫我介紹嘅我就真係介紹唔到，因為其實就真係冇乜特別。講下佢特別推介嘅蓮藕鯪魚餅，初頭以為係普通煎嘅，原來就係炸。入邊嘅蓮藕咬落去有颯颯聲嘅感覺，但係鯪魚唔多覺，加上係炸嘅話我本人唔係好鍾意。可能中意食炸嘅就會中意。另外個黃沙豬潤腸，中規中矩。 外面的皮覺得略厚，入邊嘅豬潤就唔夠爽身，但係食落去就有濃嘅豬潤味道。好食嘅就莫過於佢嘅雪山叉燒包啦，上面個皮睇落去好似好軟咁樣，但係咬落去會有輕微焗脆嘅感覺，包內滲出牛油香。入邊嘅叉燒都幾足料。唔知係咪啲旅遊書介紹得多，所以九成嚟食嘅都係遊客，包括內地人同埋外國人。我覺得要我再嚟食嘅機會比較細啲，除非有朋友想食。