博多拉麵 (已結業)

男朋友鐘意食拉麵，沙田區又無乜選擇，見呢間未試過，但係見唔駛等位，就試一試啦。坐低都覺得有啲唔對路，八點鐘晚飯繁忙時段，竟然得四成滿。Menu上面最啱食嘅「豬軟骨烤雞串拉麵」竟然八點鐘就話賣哂，咁唯有叫咗一個「叉燒雲吞拉麵」同埋「吉列豬扒拉麵」，再加一杯橙汁同一杯凍檸茶。嘢飲嚟到，杯橙汁啲Size大概只得100ml，細杯都算嘞，仲要勁溝水，淡到不堪。後嚟要求店員換杯凍檸茶，waitress一聲唔好意思都冇，還要聽到水吧職員埋怨做乜要換，點知原來凍檸荼嘅味道都唔好得幾多。而且Waitress不論放低嘢食或嘢飲，永遠都就咁放低就算，攪到我同男友要自己喺狹小嘅枱上面進行嘢食大執位。老實講個「叉燒雲吞拉麵」尚算OK，至於個「吉列豬扒拉麵」就簡直令人扯火。豬扒又細又乾，啲炸粉鬼咁厚，肉就得少少，味道差得難以形容。啲粟米一啲味道都冇，連平時最愛食粟米的我都食咗唔係食咗好多。成個麵叫做合格嘅係個湯底，唔太咸清清吔OK。總結，無論食物質素、份量、服務態度、價錢合理度各方面都唔合格，呢間嘢真係就算免費都唔會再去，無謂搵氣自己受。特此寫上食評，免得更多人遭殃。