香港地 (已結業)

屋企附近早餐食嚟食去都係嗰幾間， 家姐話我唔嫌佢已經嫌，於是今朝我地就去左奧海城，話嗰度有間香港地，係美心集團旗下嘅，可以試下。點知中伏！我地已經揀左最穩陣嘅牛尾濃湯長通粉早餐，配腸蛋豬仔包。個湯通粉率先登場，真係技驚四座，不過係驚嚇個驚， 首先店員係乜都冇講就求其將個通粉放低係枱邊，然後，呢個橫睇掂睇都唔似牛尾濃湯， 似稀釋左嘅意粉汁囉， 湯內完全食唔到任何材料，味道堅似蕃茄意粉汁溝水而且冇乜味。通粉質地反而唔錯，煙韌有咬勁。英式腸係烚熟，一啲味都冇，腸衣太韌，炒蛋尚算可以，但豬仔包似擺左好耐。整份早餐味道質素都好差， 連美心快餐都比不上，性價比奇低。