僕之拉麵 (已結業)

肉愛食者拉麵（Meat Lover Ramen)叉燒3倍+角切叉燒＋葱＋味筍＋味付鶏蛋3倍份量嘅叉燒真係好多，圍繞住碗邊整齊排好，見到拉麵個刻就覺得好驚喜，真係肉愛食者最愛。除左一片片嘅叉燒外，仲有粒粒嘅角切叉燒，可以一次試到兩種不同口感嘅叉燒。叉燒咬落唔會好韌好乾，容易入口。另外糖心蛋做得好好，鮮橙色嘅蛋黃，咬落仲係流心，充滿蛋香。特選拉麵 (Special Ramen)叉燒1.5倍＋炙叉燒＋紫菜2枚＋葱＋味筍＋味付鷄蛋炙叉燒係特選拉麵先有嘅預設配料，大大塊放係拉麵上面，仲長過個碗。炙叉燒燒到金黃微焦，顏色好吸引。燒過嘅叉燒油脂感重啲，肉味香濃。兩碗都係叫左豚骨濃湯，重口味嘅我想試再濃啲，所以其中一碗叫左更濃。普通濃湯望落就好濃稠，入口好濃郁。炸章魚估唔到炸野都做得幾好食，炸得香脆，但章魚唔會炸到好乾好韌，章魚依然保留到水份，香脆彈牙。