French Lab (已結業)

星期六在九龍灣諗住去飲茶，點知周圍都好多人，在OpenRice搵到一間在附近，好似幾唔錯的法國菜，一於就上去試吓。其實都唔難搵，電梯上一樓就係，地方不大，裝修別致，開放式廚房。只有一張lunch Menu，選擇並不是太多。店主推薦：香煎油封鴨髀太陽蛋配黑松露意大利飯，佢話好多客人食過都好欣賞。老實說，賣相並不吸引。但一食之下，感覺鴨髀油香充足，外皮脆，鴨肉嫩，並不會鞋口，比想像中好食。意大利黑松露飯，黑松露味道濃郁，配上野菌，感覺creamy，飯偏軟。牛骨髓牛肝菌肉醬配闊條麵好少見到咁大條牛骨髓原條上，牛骨髓甘香肥潤，充滿油脂香味，加上有香草的配搭，將它放在闊條麵上撈勻一齊食，感覺非常滿足。可能是星期六，只有清水供應，並沒有drink menu，有點可惜，但食物質素及價錢的確屬於中上，唯一遺憾的是，份量不是太多。另外他們還有雪櫃放在門口，有油封鴨髀，香草焗田螺，法國春雞……等，有外賣冷凍食品供客人買走。雖然是一間小店，但看得出他們的確是有心思，及對食物是有熱誠的。應該會繼續支持，下次再試吓他們其他的食物種類。