川婆婆 (寶勒巷) (已結業)

當然喺深圳食過螺螄粉，嗰陣時嘅感覺還可以， 以獵奇嘅方式去試個人來講其實同食米線冇乜分別，只係個湯底嘅氣味比較濃郁。好出奇地前排香港流行過螺螄粉嘅熱潮，旺角一條街竟然有幾間，有啲仲要臭到街外都聞到，bookmark左一定要試下，不過未有機會食之前發現原來尖沙咀嘅川婆婆竟然都有螺絲粉，呢日晏晝就喺香港食咗第一次嘅螺絲粉。兩個人一人一碗，我叫咗鮑魚螺絲粉，另外一碗就係羊肉螺絲粉。同車仔麵一樣，基本上其實你可以揀唔同嘅菜式，我嗰碗較香港嘅選擇，羊肉螺絲粉就比較靠近深圳嘅味道。一碗螺絲粉，有酸豆角，酸筍，炸腐皮，炸花生，鵪鶉蛋，青菜等等必有嘅項目，亦都有出奇地有點難聞嘅螺絲粉湯底，不過呢度有得揀選麻辣湯底同唔食辣嘅菌皇雞湯底。鮑魚水準正常，羊肉都可以，只不過份量比較少，我哋每人加咗炸蛋同臭豆腐，呢啲比較地道嘅食物就反而更加出色，特別係炸蛋，好彩做咗功課見到一定要叫，好食。佢哋嘅牛頸脊比羊肉出色得多。食完之後，冇旺角嗰間感覺咁強烈，因為味道唔算太濃烈又或者太臭，不過食完先至發現原來呢度夜晚有一串串嘅麻辣燙食，除咗螺絲粉，應該可以再嚟食飯。