一樂小鍋 (已結業)

今日做完facial，男朋友接我就係附近食少少野先。今次去食車仔麵，位於商場一樓，商場超近石門馬鐵站，都幾方便。裝潢設計好企理，座位舒適，完全無平時食車仔麵好逼狹既感覺。今日星期六都有下午茶，不過我同男朋友就各叫左三餸車仔麵。<秘製金錢肚、豬紅、魚片頭、油麵，$41>秘製金錢肚，$13；豬紅，$8；魚片頭，$8；油麵，$12金錢肚整得都幾入味，不過略嫌唔夠腍，如果腍啲我會更喜歡。豬紅男朋友覺得不錯。魚片頭欠左啲炸既脆卜卜感覺，但都不俗。<秘製豬頸肉、鮑汁花膠、韮菜燕餃、泉水烏冬，$55>秘製豬頸肉，$14豬頸肉整得好腍好好食，味道又唔會太鹹。鮑汁花膠，$14個花膠真係超級正，$14有塊咁大既花膠，而且唔係超級薄嗰啲，有啲口感，同埋都有少少黐嘴。韮菜燕餃，$13呢個餃係分開上，我覺得係自家制，就算唔係都好高質，餡料好新鮮，但略嫌鹹左少少。泉水烏冬，$14呢到既烏冬好煙韌好好食，同平時車仔麵食嘅烏冬完全唔同，我覺得好似日本烏冬。整體而言，呢到既車仔麵好高質，座位舒適，又幾抵食，而且星期六都有下午茶。