雲桂川冰室 (已結業)

今日入咗屯門，同朋友諗住睇下邊度有好嘢食，上網見呢間都幾多好評，就嚟咗呢度食，嚟到嘅時候五點幾人唔係好多，環境都幾乾淨舒服。我哋嗌咗一個雞煲，一個椒鹽鮮油同埋兩杯奶茶紅豆冰。我哋嗌咗細嘅雞煲， $158，雖然係嗌咗細size，但上到嚟好大煲，比起出便來講份量多，醬汁正正常常，啲雞冇冰鮮味，幾抵食。我哋唔係好食得辣所以喺一上嚟嘅時候就即刻將啲辣椒夾走晒，不過對我哋來講都係辣得滯，如果唔食得辣嘅人要注意一下。椒鹽鮮魷個炸粉啱啱好，唔會厚，唔會太油，啲炸粉嘅質感係比較粗，魷魚新鮮，80蚊，價錢份量都okay，想食可以嗌。奶茶紅豆冰幾好飲，奶茶唔會太甜，香濃，紅豆份量適中，22蚊，唔錯。兩個人食到好頂肚，三百有找，經濟實惠。