金記冰室 (八號花園) (已結業)

最近大埔開咗幾間新冰室，今晚屋企無煮飯就揀一間試吓先！諗起金記冰室，平時多數去銅鑼灣嗰間，因為比較近公司，但屋企附近開咗當然要去試吓啦！睇吓係咪每間都咁有特色先~呢個餐牌已經有分別，銅鑼灣係用乒乓波拍去做，而呢度係以懷舊月曆，幾有心思！我哋叫咗兩個餸加一個碟頭飯，其中一個餸可以另加十五蚊包餐湯同一杯飲品~有中湯同西湯選擇，我哋選擇咗羅宋湯，煲得都好入味，入口夠酸唔會太咸好好飲！餐飲叫咗一杯菠蘿冰，冇諗過會有雪糕球同埋用雪碧做底，感覺好fresh~ 真係第一次咁飲！媽咪就叫咗懷舊飲品蛋白杏仁茶，佢話好耐無飲，好多茶餐廳都無咗，估唔到呢度有得叫，都幾驚喜！先嚟個咖喱牛腩飯，咖喱味夠香，唔係太辣容易入口，牛腩亦煮得比較淋身，而且份量都好多！另外再叫咗個蝦仁炒蛋，要大讚個蛋炒得好滑好嫰，入口有濃濃嘅韮王味道，而蝦亦好爽口好新鮮！送飯一流！最後叫咗雜菌炒時蔬，味道甜甜哋，應該用蠔油炒嘅，蔬菜亦炒得剛剛好，入口爽身！得兩個人真係試唔到咁多，下次會再想去試埋滑蛋叉燒飯！屋企附近又多咗一個飯堂！