三川居酒屋 (已結業)

係銅鑼灣食晏，真係有好多選擇，今日约咗個朋友食晏，佢係銅鑼灣區工作，所以約佢係銅鑼灣地鉄站B出口等，行上地面再轉左行幾步，已見一間叫做三川居酒屋，以為係樓上舖，點知行到埋去先知係地庫，重有條樓梯行落去嘅，周圍環境幾特別，唔知我倆係咪早咗到，所以唔使等位己可入座，朋友望完餐牌，叫咗嗰日式牛肉鍋，我要咗一個火之夢壽司山，同一個厚燒牛舌，可以倆嗰人一齊分享，日式牛肉鍋先到，嗰擺設好靚，中間有隻日本雞蛋，侍應話首先將隻雞蛋攪勻先食鍋裡面的食物，會好味啲，牛肉鍋内有金菇， 菜， 冬菇，黃芽白，主角梗係有日本牛肉啦，大大塊又冧又好味，黃芽白索嗮啲湯汁，一樣咁好味，再飲少少湯，感覺好似飲緊牛肉湯咁，跟住其他嘢食都來了， 火之夢壽司山 原來係有兩種 壽司嘅， 一款係 吞拿魚壽司， 一另一款係 熟蟹腳肉壽司， 仲有啲海膽同埋蟹籽係壽司上面，呢兩款壽司加埋啲海膽同埋蟹籽一齊食，另有一種味道，厚燒牛舌都好大舊，但唔太韌，牛味都好濃郁，因為朋友下午要返工，所以食飽我地就散啦。