瀛燒居酒屋

营业中

休息中

星期六收工決定搵間居酒屋chill一chill。二話不說，首先點杯酒先。自家製梅酒，甜味、果酸味、酒味剛剛好，飲落亦順滑。朋友唔太飲酒，不過為免我飲獨酒，都點咗杯手作柚子。下酒菜有平時少見嘅串炸，點咗鵪鶉蛋串炸、沙錐魚串炸同三文親子串炸。特別推介三文親子串炸，炸完嘅三文魚唔會嚡，保持魚脂，食嘅時候一定要配埋三文魚子，更加鮮甜。炸雞亦係酒嘅好朋友。同韓式炸雞唔同，日式炸雞偏向調味比較輕，著重返食材嘅質素。炸雞好嫩滑。冬天時分最岩叫個鍋，朋友唔食牛，所以轉轉新口味，點咗味噌廣島蠔鍋。總共有5隻大大隻廣島蠔，全部都好肥味，有淡淡海水味。爐邊鍋仲有簡單配料，例如野菜、菇、冬粉。冬粉吸收曬味噌湯同廣島蠔味，超入味。全晚VIP係特制火炙左口魚邊醬油漬。火炙令左口魚升華到另一層次，油脂涌出嚟，魚質好柔軟。醬油漬用上柚子，令食甘香並充滿油脂嘅左口魚唔會膩。海膽甲羅燒配上燒飯團。甲羅燒好多蟹肉，豐富，食食下根本唔夠飯配甲羅燒。特上刺身盛合有三文魚、吞拿魚、油甘魚同埋帶子。店主好大方，刺身極厚身，質素亦好。整體而言，作為小型居酒屋，質素有驚喜，選擇亦多元化。