尚鮮海鮮料理 (已結業)

呢幾日天氣仲係有少少涼，當然就係香港人最中意嘅打邊爐時間。呢間尚鮮嘅火鍋套餐都相當豐富，就連湯底選擇都好多，而呢款姬松茸冬瓜湯底唔會肥膩之餘，仲有姬松茸帶出鮮味，都係個幾養生嘅選擇。而打邊爐之前，仲有清酒鮑魚、泰式生蝦作前菜小食，鮑魚有著無窮鮮味，入口亦彈牙，而泰式生蝦亦跟泰式餐廳食到嘅無分別，同樣係新鮮選料，相當開胃。打邊爐當然唔少得食海鮮，呢個海鮮盛盒有海蝦、 聖子皇、鱔片、大蜆，款款食材份量十足，聖子皇同大蜆都係潔淨無沙，係滾湯中煮熟，仲可以食到無比彈牙嘅口感; 而鱔片通透去骨，食到啖啖魚肉，魚皮更係骨膠感滿滿。最後有數款肉類，手切安格斯牛脂肪比例分佈平均，只要30秒左右時間，就可以食到嫩滑順喉嘅口感，牛肉味香濃，質素極高。而豬紅、豬皮、芝心獅子狗卷等食材，放落湯底後，既吸收到湯中嘅精華，同時又品嚐到食材中嘅口感，確實係一流享受。