White Button Cafe & Dessert (已結業)

DINNER SET FOR TWO $398兩個田園沙律和餐湯之後就係要選擇嘅時候，因爲有六樣食物揀三樣，姐係需要每行都二選一，睇番個人喜好同口味。蜜糖法蘭克福腸或日式芝士炸蝦，我地選擇咗要日式芝士炸蝦，細細件好精緻，有充足芝士佈滿炸蝦，雖然蝦唔算大隻，但睇落都幾吸引。蘆筍雜菌意粉或櫻花蝦明太子麵，我地選擇咗要櫻花蝦明太子麵，依個菜式係餐牌上面嘅餐廳推薦，大量櫻花蝦配上紫菜，顏色非常鮮艷奪目，有層次的鋪排，食落都幾好味。香煎一級香草肉眼牛扒或法式烤羊架，我地選擇咗要香煎一級香草肉眼牛扒，聽個名都知道牛扒嘅級數，牛扒容易切割，醬汁清香，唔會搶去主角的味道，兩者互相配合，口感一流，值得一試。套餐奉送咖啡或檸檬茶，但餐廳嘅特飲實在太吸引，我地叫咗一個水晶球同一個鐵塔，分別係荔枝玫瑰乳酸爆珠同東京鐵塔，兩者都非常有特式同充滿新意，吸引不少人拍照留念。順帶一提，跟餐轉特飲只需要每杯加$28。最佳損友 $78飯後甜品方面，我地選擇咗最佳損友。甜品係用獎杯裝著三色雪糕球包括曲奇、抹茶同雜莓味，再加上忌廉，香蕉，脆脆等，賣相已經非常吸引，充滿口感，令人一試難忘。