平日晚餐時段來到座無虛席要等位。第一次來到以為落單梗係要出cashier，原來個運作係好似普通餐廳叫店員幫手就可以，遮遮完全沒有用紙mark底就記得曬要落既items，快而準！food court內見到粉紅色flamingos前有自助水機可以自己斟水，餐牌內的fountain就是飲品部，你叫任何一間食店都可以夾The fountain -$10 大會指定飲品部咁。
沙爹串燒炒飯（雞肉、牛肉、豬肉）$68
抵食之選！平日就咁食三條串燒已經差不多係呢個價，還要加上有飯！平日泰國餐廳食串燒幾條都幾十蚊，仲有個有味飯底一齊食。正常是跟雞肉、牛肉、豬肉，不過當日到訪沒有豬肉，都唔緊要，牛雞串燒各2串，食落啖啖肉，而且整個份量幾足，配粗粒花生沙嗲醬及泰式酸辣汁。飯粒粒分明，雖然顏色好深，其實係調味料的顏色，不是豉油了啦。
冬陰功金邊粉 $55
偏酸少辣的冬陰功，酸味調得剛好非常容易handle，酸度非常開胃，隻蝦size不細，而且我最在意是否清潔得乾淨，答案是十分乾淨！
豬頸肉一份 $68
本來隨意加個小食，這碟是出乎意料之外的惹味，以炭燒形式加上甜蜜汁去製作，肉的調味食落跟叉燒有幾分相似，炭燒味濃，沾香辣醬汁加個辣度提升味蕾的層次感，追住食。
芒果糯米飯 $58
泰國芒果甜，糯米飯捏成兩大舊超飽，加上椰汁係完美句號。
泰式青檸蘇打 $28
想襯翻泰式菜，在Fountain order了清檸蘇打水，薄荷味道很強，refreshing！
去唔到尖沙咀咁遠，觀塘都有佢地既外賣店
