鰻工房 (已結業)

有朋友外國翻黎，好想食鰻魚飯。香港專食鰻魚嘅地方真係唔多，我book mark咗呢間一直未有機會試，今次一於同埋朋友去試下。舖頭唔大，但裝修十足去咗日本居酒屋小店咁。好彩當晚冇乜人，walkin都可以直入唔洗等。店內menu提供咗唔同款嘅鰻魚同食法配搭，我地分別叫咗二重丼，三重丼同埋原條鰻魚丼。加$18有套餐(溫泉蛋，前菜，鰻魚肝白貝湯，飲品)。鰻魚餐一上到枱好有日式便當感覺，飯面舖滿咗紫菜絲，蛋絲同枝豆粒，鰻魚另外分開一格。原條蒲燒鰻魚蒲燒醬汁味道啱啱好，肉質算厚，皮亦好有彈性(放耐咗食就會變韌)。二重丼二重就係除咗有原條鰻魚外，再加多一條穴子海鰻，面豆再加咗山椒粉。穴子對比質地較軟淋，加埋山椒粉，風味再出啲。三重丼就係比二重嘅原條同穴子再加多一款生燒。佢將三款鰻魚砌晒上飯面，然後再砌到成朵花咁，比較啱打卡。但望落蒲燒鰻魚嘅分量就應該冇咁多。食到尾聲建議留1/3條鰻魚同飯，店舖會提供多一款食法: 鰻魚茶漬飯。可以主動問店員拎一碗昆布高湯，然後加入餘下嘅鰻魚飯，再因個人喜好加入紫菜，芝麻。鰻魚茶漬飯就完成。三款對比落二重丼嘅CP值係最高，但如果對鰻魚只係一般般，叫原條都好抵食。