門面佈置充滿燈籠，仲有隻黑色招財貓
餐牌比一般居酒屋更多選擇，眼花撩亂
▶️ 雜錦刺身沙律 ($108)
唔係講笑，刺身同沙律比例接近一比一
刺身係各式各樣魚類🐟食落新鮮唔韌
另外仲有玉子蛋、車厘茄、青瓜
沙律醋汁帶山葵味🥗清新又配襯沙律菜
▶️ 胡麻醬魚生米紙卷 ($68)
近排興用米紙做新穎嘅菜式
呢度將米紙取代米飯，包住玉子蛋、蟹柳絲、青瓜、魚生
米紙又黏又韌，成個口感好唔錯👍🏻
簡單配上芝麻醬已經好夠味
絕對係輕盈版壽司
▶️ 月見元貝燒 ($48)
月見免治雞肉串就見得多，配帆立貝真係第一次見
元貝燒至全熟，size有返咁上下
蛋黃漿狀可以黏住香蔥
略嫌調味淡咗啲🤏🏻如果加返少許醬油會更好
▶️ 大蔥雞肉串 ($32)|日本雞肉 ($26)
雞肉整得啱啱好🐔又香又juicy
仲要冇雞皮冇肥膏
大蔥咬落爽脆且香口，照燒汁惹味
▶️ 日本雞腎 ($26)
咬落爽彈，不過可能自己食唔慣內臟，覺得有啲臭味😀
▶️ 薄牛肩 ($38)
呢個有驚喜！入口超軟腍又重牛味
配合燒牛肉汁，好正🐂
▶️ 番薯天婦羅 ($88)
一客五件，天婦羅粉薄薄一層
可以點鹽同埋有白蘿蔔嘅汁，減去油膩感🍠
▶️ 牛油果軟殼蟹反卷 ($108)
賣相唔錯，一客六件
一片片牛油果勁熟，有牛油果香之餘口感creamy🥑
另外配上蟹籽同沙律醬
唯一係軟殼蟹比預期細，同唔夠香脆
▶️ 山口縣瓦片牛肉蕎麥麵 ($138)
✨特式菜✨
綠色嘅蕎麥麵預先炒過再煎香，呢個製法都係第一次食
本身蕎麥麵彈牙煙韌，煎完之後脆脆地似飯焦口感😍
牛肉份量慷慨，好腍，調味似韓式醃牛肉
加上雞蛋絲同紫菜碎作點綴
鍾意可以將蕎麥麵點豉油食，係另一番風味
個人覺得呢個菜式好值得試❣️完全改變我對蕎麥麵嘅認識
▶️ 啤酒 ($19x2)
七點前落單做happy hour優惠
爹哋見咁抵，一次過飲咗兩杯🍻
-
三個人叫咗十樣嘢好夠食
最難忘一定係 「山口縣瓦片牛肉蕎麥麵」✨
前菜同串燒都做得好唔錯
環境有feel，周圍嘅裝飾好昭和風🇯🇵
服務態度幾好，侍應醒目有禮貌，上菜又快手
性價比高，用openrice book枱可享85折，加一後平均$250/人，抵食！
